Sunday, March 10, 2024

මේ දුක් පිරුණු සසරට යලි නොම එන්න....🙏🙏

සහසක් පැතුම් මල් සිත් කොන    හොවාගෙන

දහසක් කඩොලු මත දිවි ගඟ            හඹාගෙන

පැතු දිවි පියුම් එන විටදිම                     පිපීගෙන 

කඳුලක් නතර විද බැඳි ලොව             කඩාගෙන.... 


ගණදුර කපා සුදු සඳ රැස්                    පැතිරෙද්දී 

දවසෙක වෙහෙස බැඳි ඒ නෙතු            පියවෙද්දී

සිව් දරු සෙනේ මැද මව් හා                සැතපෙද්දී

අමනුස් සිතකි රුදු කෝ ලෙය                   දිදුලද්දී.... 


කවියට වචන නැත උණු දේ                 පවසන්න 

පපුතුර සිතුම් හිර වී බැහැ පන                ගන්න

උණුසුම නැතිවිනිද මව් ඇකයෙන්             දුන්න 

කිරි කැටි දූ හටත් දැනුනද ලෝ                 ගින්න....


රත් පැහැ අහස සිය සෝ දුක්         කියනකොට

පණ නල අහිමි විනි අසරණ දිවි                  සයට 

සිතුවිලි නතර වී ලොවෙහිම කඳුළු             කැට

අනියත බවම වැටහිණි දිවි තෙරෙහි           මට....


නිසසල පුතුනි හැකිනම් යලි          ඇහැරෙන්න  

නුඹ සිටි රෝස කැලයට දුව ගෙන            යන්න

ලොව හරි සැරයි බැහැ සුර දරු හට         ඉන්න 

මේ දුක් පිරුණු  සසරට යලි නොම           එන්න....  


සුන්දර දරු සිනා උරුමව නැති                       වීද 

කෙලි සෙල්ලම් බඩුත් නිවසෙහි තනි            වීද 

අදහනු නොහැකි මුත් කඳුලම හිමි                වීද  

බියකරු සසර ගැන ලොවටම                 පැවසීද.....  



Photos from Hilda Jayewardenaramaya GoFundme Account.


 


Friday, January 12, 2024

සිසිර කුමරුගේ ප්‍රේමණීයම දින කිහිපයට ~.~

සීතල සියුම් සමයකි රුදු සැරෙන මිදී 

උණු කිරි කෝපි සුසුවද මදනලෙහි ඇදී  

යන්නට මතින් සුර සිරි මිහිමතින මිදී

සිසිරෙහි කුමරු වෙත ලියැවිණි මෙකව පැදී... 


ආසිරි කැවුණු මල් ලෙස හිම පියලි සලා 

මිහිලිය වටම දිලිසෙන සුදු පලස් එලා

මද නල එක්ව තාලෙට අම රසය ගලා 

ඔහු ඒ සැනින් මිහිලොව සුර ලොවක් කලා...   


මිහිලිය තුටින් පොරවා ලද සුදු සේද

තුරුලිය මතින් හැඩ ලෙස අතුරායාද

කුමරුනි නුඹත් ඇගෙ කෝමල දුටුවාද 

ඈ මේ විලස කුමකට සැරසෙනවාද.. 


හිරු දෙව් හිමින් ඕ අතපය හිරි හැරලා

ඈ සුදු සේල සිප ගන්නට වෙර දරලා 

රැස් වැටි සේල පිණි හා දිලිසෙනු දැනිලා

ඇගෙ හද විලම නිකළැල් අදරින් පිරිලා... 


කුමරුත් මිහිලියත් රස පෙම් කතාවක 

කොඳ මල් පිදුණු ලොව ඉමිහිරි සිනාවක 

දිලිසෙන ලොවම සතුටින් ගී ලතාවක

හැඟුමන් මගෙත් දැන් අමුතුම රටාවක... 













Figures: 2023 Winter collection from my lens!.~ 😊

Saturday, January 6, 2024

ආලය වන් මනුදම් සුරකිම් නිති, එතැනය සුර ලොව නම්..~ 💛


සුපිපෙන පැතුම් මල් ගොන්නක් හදෙහි කොනේ

පොපියන සිතුම් දහසක් සිත පතුලෙ පෙනේ

විකසිත වන්න වෙර දරනා අයුරු දැනේ 

රුදු වැට කඩුලු උන් මග ඉදිරියෙහි පෙනේ


සඳ නැති වුනත් අහසෙහි පොඩි රුවන් කැට

පතුරයි එලිය ලොව ගනඳුර මකන්නට

ලැබුනොත් දිරිය උන් යනු ඇත දිනන්නට

අත හිත දෙමුද යන මග එලි කරන්නට


දැන් මතු වුවත් දුක් බිය සිතිවිලි බෝම

මන්දිර නැති වුවත් සිරි සැප දෙන තාම

පින් මල් තිබේ නුඹ හට දිරි දෙන පේම

යන්නට පය තියන්  හිත දැඩි කර මේම 

Figure: In the new spirit of the new year, WKKV officially inaugurated the construction and renovation works of the computer laboratory with the kind donations received so far.!
~ 2024-01-05 ~


 

Tuesday, October 31, 2023

ඉතිං ආදරෙයි තාමත් යශෝදරා...

Love is a powerful force that binds hearts and souls, transcending barriers and igniting the human spirit, and I believe that there's no time to express our feelings!...😊~

In the quiet solitude of my days, I find myself yearning for a love that is as pure as the untouched snow, a connection that reaches beyond the superficial that embrace the very essence of my being. Loneliness becomes the canvas on which I paint my hopes and dreams. I patiently await the arrival of a love that understands the depths of my heart. Each day, I keep my hope alive, believing that one day, the universe will gift me with a love so genuine and profound that it will wash away the ache of loneliness and fill the void with an eternal warmth!...😇

I have written this poem on 2015, February 20, a time when thoughts of love hadn't yet fully blossomed within me 😂, though perhaps, even then, I have silently yearned for something beautiful to grace my life!....👼

And, I am still wondering, Where are you!...😐

The younger version of myself would be excited to see where I am today, and remarkably, the dreams and aspirations remain as exactly the same as ever!......~.~

Unexpectedly this poem is my 100th published poem! 😊


නෙතට ගැලුව කඳුලැලි නිති ඔය දෑතින්................පිසලන්නට

සිතට ගැලුව අම පෙම් දිය පෙනුනි කෙමෙන්......දිලිසෙන්නට

ඔබට මසිත ඇදුනිය සොහොයුරු මිතුදම..............බිඳලන්නට

පෙමට බැදුණි නොදැනිම පතනා සිහිනය............සිරිදෙන්නට


තුටින් බැඳුනු මිතුදම සරසවියෙහි සවි.....................පාදන්නට

පෙමින් බැදුණු වග සොදුරුයි මුළු දිවියට සවි...........දෙන්නට

සිතින් සිතක් යා කරමින දුර වුව නිති...................හමුවන්නට

ඉතින් බඳිමු පෙම් කවි නැගෙනා සරතැස...........බොදවන්නට


ඉරා අදුර සිසි වැඩි යුරු සුර ලොව සිරි................පිබිදෙන්නට

නුරා බැලුම් සමගින් මුදු පෙම් සිසිලස................විසිරෙන්නට

දරා නොසිට හද පත් පෙම සත් සමුදුරු..............ඉතිරෙන්නට

සරා සඳක් වනු නුඹ මට දිවි ඇති තුරු..............සැනසෙන්නට


විදා කිරණ  ආලය හද මුදු සොම්නස................මතුවෙන්නට

පුදා අමිල විස්වාසය දෙහදක් මතු යා........................වන්නට

සදාතනික බැදුමන් තද පෙම් සිසිලෙන්................ඔදවන්නට

සදා පුරමු පින් මතු බව අප අපටම......................හිමිවන්නට 


Photo: As I make my way home late at night from the lab, the moon offers a gentle greeting, hinting that the universe is planning to gift something exceptionally beautiful upon me!.💙. 
Yes! I will be patiently waiting for that beautiful feeling.! 😊
(Captured near the sky train station, Coquitlam)

Monday, October 23, 2023

දෙවෙනි අම්මා, මාලා නැන්දාට ..~😊

මව් පියන් හැර එද්දි 

අරුම ලොව තනිවෙද්දි

සුර ලොවින් ලදමි මං   

දෙවෙනි අම්මෙක් උතුම්...


තනිකමට තිත තියා 

තෙවැනි දුව යැයි කියා

සෙනිහසම විදිමි මෙහි 

ගෙදර වාගෙම මමත්...


නිති ඔවා දෙනවාට 

දුක සතුට බලනවට

මගට දිරි දෙනවාට  

මව්නි තුති මල් නුඹට...


සිත තුටින් ඉතිරෙන්න

දිවි මගම සුබ වෙන්න 

සුබ උපන් දිනයකට 

මගෙන් සුබ මල් මෙන්න...





Sunday, October 15, 2023

~... ආදරණීය හෙමන්තයට ...~


සුන්දර ගෙතුම් වැල් යලි මිහිමත ඇදිලා 

රන්වන් පාට සළු ඈ මෙවරත් ඇඳලා 

පින්බර සිතුම් ගොන්නක් හද තුල පිරිලා 

පන්හිඳ යලිත් පන ගත්තයි හිරි හැරලා  


මිහිමත නොයෙක් පැහැ තුරු පත් රටා ඇදී

නොඉදුල් සියුම් මද නල සිසිලසින පිදී 

ගලනා සිරින් නෙතු ඉවතට යන්න නොදී

පිපිලා වගෙයි මහදත් නව පැතුම් පොදී 


හිරු දෙව් හොරෙන් ඇය වෙත පෙම් කොමල සලා

තුරු මත සියුම් රැස් නොරිදෙන පරිදි ගලා

පිනි බිඳු රනින් දිලිසී තරු පලස් උලා 

ඇගෙ රූ සිරිය ඔහු තෙදසින් දෙගුණ කලා


සීතල මද නලෙහි තුරු පත් රංගනයේ  

සියොතුන් මධුර ගී මැද සිරි වින්දනයේ 

රසදුන් පිදුණු නෙත සිත මගෙ සංයමයේ   

ගොළු විනි මමත් දැන් නම් පද නැත කවියේ 


පොඩ්ඩක් දෙපල මේ දේ දැන් අහනවද

දෙව්ලෝ අසිරි මිහිතලයෙහි මවනවද

ලස්සන පැතුම් මල් හද විල පුරනවද    

මගෙ තනිකමත් හොර රහසෙම මකනවද... 🥹🥹🙃😇











Photos: 2023 Fall collection from my lens 😊

Photos: 2023 Fall collection from my lens 😊


Saturday, August 26, 2023

තව දින පහයි පොඩි දුව ගෙදරට එන්න 👧

සදකැන් ඇතිරි ගෙමිදුල දොරකඩට වෙලා

තනිකම ඉතිරි නිවසෙහි පන ඉවත නොලා 

හිරු පායන තුරුම දරු දුක සිතෙහි වෙලා 

මව් පිය දෙපල සෙනෙහිනි පෙරමගම බලා  


යව්වන වයසෙ දෙව් මන්දිර සැදුවාද 

රන් කිරි පැටවු දෙදෙනෙකු පන පෙව්වාද  

උන් සිප් සයුරැ තෙර විස්කම් පෑවාද 

නොදැනිම උනුත් නුඹ හැර දා දිව්වාද 


රන් දහදිය හෙලා උන් කුස ගිනි නිව්වා 

නන් දුක් කටොළු ආවත් ජයගෙන දිව්වා 

පුන් සඳ එලියෙ මිදුලෙහි රස කවි කිව්වා 

උන් දිනනා තුරුම සිප් දිය පන පෙව්වා 


මව් පිය රදුනි තව පොඩ්ඩක් ඉවසන්න

රජ පුටු හිමියි නුඹලට ලගදිම ඔන්න  

මේ යන මගෙහි යන්තම් තව පන ගන්න 

තව දින පහයි පොඩි දුව ගෙදරට එන්න  

Photo: The last photograph of my motherland taken on February 4, 2022. The scenery wasn't as striking as the vistas I've witnessed in foreign lands, but in her embrace, I found a wealth beyond compare: love, tenderness, nurturing connections, friendships, and bonds that resonate with immeasurable value. It's as if I left a piece of my heart entwined with every cherished memory there😐.